Ullut naggaserlugit Julie Berthelsen-ip ippassaq unnukkut tusarnaartitsinermini kammalaatini tusarnaartitseqatigeriataarpai, tassaasut Kimmernaq Kjeldsen, Nina Kreutzmann Jørgensen kiisalu arnaq danskeq tusaamasaq Søs Fenger.
Ilaqutariippassuit amerlaqisut Danmarkimeersut Kalaallit Nunatsinneersullu Tivolimi aaqqissuussineq tamanna peqataaffigiartortarpaat.
- Ilaquttat suleqatigisimasat ikinngutillu ulluni taakkunani takorniussallugit uagutsinnut tunissutaasoq annertoqaaq, uagummi nunatsinnukarnissatsinnut periarfissaluttorujussuuvugut, taama oqarpoq Nina Lyberth Jyllandip avannarpiaani ukiut sisamassaa najugaqartoq.
Ninap ernini Aputsiaq 14-inik ukiulik Københavniliaqatigaa kalaaleqatiminnik naapitsiniarlutik.