Karadzic Haagiliaappaat
Karadzic pillugu suliassaq eqqartuussiviup isigineqarneranut eqqaamaneqarneranullu aalajangiisuulluinnarsinnaavoq. Tassami suliassap quiasaarutaannartut naggateqarnissaa ilimagineqarsinnaammat.
Qanoq pisoqaratarsinnaanera paasikannereerparput. Ulluni arlalinni Radovan Karadzicip illersuisuata oqaluttuarisarpaa Karadzicip Serbiamiit Haagimut tunniunneqarnissaa pillugu naammagittaalliuut nassiussimallugu. Ulloqeqqatali siornatigut taassuma nassuerutigaa naammagittaalliuut nassiussimanngivillugu. Siunertarineqartorlu tamarmi tassaavoq Karadzicip tunniunneqarnissaata sapinngisannguamik kinguarsarneqarnissaa. Taamatut pisoqaannassappat Haagimi eqqartuussinissaq quiasaarutitut inerneqariaannaavoq, soorlu siornatigut Serbiap siuttuata Milosevicip eqqartuunneqarneratulli.
Eqqartuussivik manna eqqartuussivittut piviusuunngitsutut isigaara, Milosevic Haagimi sassartinneqarami taama oqarpoq. Serbiami naalagaaffimmik pingaartitsisut amerlanerpaat assigalugit eqqartuussiviup nunarsuup kitaanut sakkuginiarneqarnissaa itigartippaa. Imminut illersornissani ilungersuutigigaluarpaa, ukiut marluk matuma siornagut parnaarussivimmi ineeqqamini toqunissani tikillugu. Illersuisuatalu oqarnera malillugu
aammattaaq Radovan Karadzic imminut illersorniarpoq, tassa taanna upperissagutsigu. Assigiinngissutaali uaniippoq, Milosevic inatsisilerituutut ilinniarsimasuummat, Karadzicili nakorsaasiornermik tarnillu pissusaanik ilinniarsimasuulluni. Taamaattumik ilimanarpoq Karadzicip imminut illersornissaa eqqartuussiviup itigartissagaa, kisiannili taassuma eqqartuussinermik suliassaq aserorniarsinnaavaa, eqqartuussivillu politikkikkut oqallittarfittut atorniarsinnaallugu. Eqqartuussinerup quiasaarutitut pinngitsoorniassagaanni imaassinnaavoq Karadzicimut unnerluussutigineqartut ilaat peerneqartut, taamaalilluni eqqartuussinermik suliassaq sivikillisinneqarluni, Haagimilu unnerluussisussaatitaasut maannakkorpiaq unnerluussutip allanngortinneqarnissaa isumaliutersuutigaat.
Haagimi eqqartuussivimmit aatsaannguaq oqaatigineqarpoq Karadzic aqagu ualikkut eqqartuussivimmut sassartinneqarumaartoq.
