Ulloriarsiuut nunarput soqutigilersinnaavaat
Qaasuitsup Ulloriaa qinnguartaassuarmit Sermersuarmiittumit aggustip qaammataata ingerlanerani sekuntikkaartumik assilineqartassaaq, napasuliaq 40 meteritut portussusilik Sermersuarmi napparneqartussaagami.
Silaannaq tamaaniittoq panertuummat uninngasuummallu, ukiuuneranilu qaammaterpassuarni taartuinnaasarmat, assilisat erseqqarilluinnarnissaat ilisimatuut naatsorsuutigaat:
- Sikuiuitsoq Kujalleq ulloriarsiorfissatut periarfissarissuuvoq, tamanna maanna ilisimaneqalereerpoq, ajornartorsiulli tassaavoq qilaap pingajorarterutaannaa taqqavani ulloriarsiorfigineqarsinnaammat. Sermersuarminngaanniit ulloriarsornissaq nunarsuup avannaatungaani periarfissarissaarnerpaasoq, lektor Kristian Pedersen, Niels Bohr Institutimeersoq oqarpoq.
Sermersuarmukarniarneq Sikuiuitsumut Kujallermut angalanermit aamma akikinneruvoq, tamannalu ulloriarsiornermut aamma pingaaruteqalersinnaalluni.
