ICASS Nuummi ataatsimeersuartitsissaaq
Ataatsimeersuarnermi aggustip 22-anni aallartittussami peqataassapput ilisimatuut nunarsuarmi tamarmeersut 300-t 400-rujullu akornanni amerlassusillit. Suliniaqatigiiffik ICASS Nuummi ulluni tallimani ataatsimeersuarnissamik aaqqissuisuuvoq.
Inuiaqatigiit pillugit isummersortartutut ilisarisimaneqartoq Finn Lynge kiisalu ICC-p præsidentia Aqqaluk Lynge, ataatsimeersuarnermi oqalugiartussanut ilaapput. Oqalugiartut saniatigut ilisimatoorpassuit silap pissusaa pillugu paasisimasatik pillugit saqqummiussissapput.
Ilisimatuut, nunap inoqqaavi allallu issittumi ilisimatusarnermut soqutiginnittut katersuutsinnissaat ataatsimeersuarnermi siunertaavoq. Birger Poppel, ICASS-imi præsidentimut tullersortaasoq oqarpoq issittoq pillugu ukioritinneqartumi inuit inuiaqatigiillu qitiutinneqarniartut. - Tamanna nutaajuvoq. Siusinnersukkummi Kalaallit Nunaat pineqartillugu pisuussutit uumassusillit uummaatsullu ilisimatusarfigineqarnerini paasisat sammineqarnerusarmata, Birger Poppel oqarpoq. Ataatsimeersuarnermi aamma issittumut ukioritinneqartumi paasisat ataqatigiissaarneqassapput.
