Ikaarsaariarnermut ataatsimiititaliat ataatsimeeqatigeqqinniarpai
Hans Enoksenilli aningaasat ikaarsaariarnermi ataatsimiititalianut atugassatut akuerisat amerlineqarsinnaanerat ilimaginngilaa. Aamma oqaatigaa saqqummiussisoqassappat kisitsisinik piviusunik toqqammaveqarluni saqqummiussisoqartariaqartoq.
- Ataatsimiinnerit ingerlateqqissavavut aamma aningaasanut tunngasut eqqartoqqissavavut. Kisianni 43 miliuuninik piumasaqarnerat Naalakkersuisunit imaaliinnarlugu akuerineqarsinnaanngilaq aamma aningaasaleereernikuuvugut. Aningaasaliisoqaqqissappallu kisitsisit piviusut tunngavigalugit saqqummiussisoqartariaqarpoq. Suliassat annertunerulernissaat takusinnaavarput. Kisianni sullinneqartut sulisullu amerlisarneqanngillat. Taamaattumik piviusorsiortumik aningaasat pillugit oqaloqatigiinnissarput qilanaaraara. Naatsorsuutigaara qaammatip tulliata aallartinnerani ataatsimiissasugut.
- Tamatta pisussaaffigaarput kommunit kattussuunnerat pitsaasumik aallartinneqassasoq. Kisianni aningaasanik taaguiinnarluni aalajangersaasoqarsinnaanngilaq. Hans Enoksen oqarpoq.
Kommuni Kujallermi ikaarsaariarnermi
ataatsimiititaliami siulittaasup Naalakkersuisut aningaasaliissutinik ilasiniannginnerat Kujataani ikaarsaariarnermut ataatsimiititaliami siulittaasup Simon Simonsenip pingasunngormat Radioavisimi
naliliinera, Hans Enoksenip isumaqatiginngilaa.
- Isumaqarpunga qulaaninngaanniit aqutsinerunngitsoq. Kommunit kattussuunnissaat kommunit peqatigeqqissaarlugit minnerunngitsumillu kattuffiat suleqatigalugu suliat ingerlanneqarnikuupput. Aamma innersuussutigineqartut malillugit kommunit kattussuutsinneqartussaapput.
- Isumaqarpunga kiffaanngissuseqartumik oqallinnerit ingerlanneqarsimasut aamma kommunit kattuteqatissaminnik kissaataat naapertorlugit Inatsisartuni aalajangiisoqartoq. Taamaattumik oqartoqarsinnaanngilaq qulaaninngaanniit aalajangiiniartoqartoq. Aamma kommunit kattussuunnissaat ukiuni arlalinni eqqartorqareerpoq, Hans Enoksen oqarpoq.
Hans Enoksenip ikaarsaariarnermut ataatsimiititaliat uppernaaq maajimi ataatsimeeqatigai.
Ikarsaariarnermut ataatsimiititalianut aningaasaliissutit suliarineqarnerannut atatillugu Hans Enoksen oqarpoq utoqqatsissutissaqarani. Kangia Kitaani ikaarsaariarnermut ataatsimiititaliap siulittaasuata Asii Chemnitz Narupip utoqqatsissuteqaqqullugu sisamanngormat qallunaatut oeqaaseqarnermini kajumissaaraluarpaa.