Miliuunilikkaanik piumasaqarnerat isumakulunnartoqartippaa
Hans Enoksen ullumikkut allakkamini ikaarsaariarnermi ataatsimiititaliat siulittaasui sisamaasut qaammatini arfineq pingasuni sulinissaminni 43 miliuunit koruuninik atuiniarnerat isumakulunnartoqartippaa.
- Ikaarsaariarnermi ataatsimiititaliat kommuninik nutaanik nutaaliaanerusunillu pilersitsinissaminnut nalissaqanngitsumik periarfissinneqarput, innuttaasunut nunamullu iluaqutaasussanik.
Kommunit nammineerlutik aaqqissuusseqqinnerup ingerlanneqarnissaa kissaatigaat, kommunit kissaataat Inatsisartunit aamma Naalakkersuisunit sutigut tamatigut malinneqartartut, naalakkersuisut siulittaasuata oqaatigaa.
Inatsisartunit pitsaanerpaanik inatsisiliornerit aalajangiunneqarsimapput, tamatumuuna qularnaarniarlugu kommunerujussuarnut ikaarsaariarnerup sapinngisamik pitsaanerpaamik ingerlanneqarsinnaanissaa. Inatsisartut 10 miliuunit koruuningajannik ikaarsaariarnermi ataatsimiititalianut tunniussaqarsimapput, tamakkununnga ilanngullugit ataatsimiinnerni atorneqartartussanik qarasaasiatigut atortunut pisiniutissanik.
- Kommuninik aaqqissuusseqqinneq aningaasartuutaanerunani sipaarutaasussaavoq, Hans Enoksen oqarpoq.