Kaannersuaqalernissaa aarleqqutigineqarpoq
Zimbabwemi nerisassaqarniarnikkut ajornartorsiortoqarpoq, inuillu millionilikkaat kaannersuaqarnermik eqqugaanissaat aarleqqutigineqarpoq. Naatitanik katersuinerit sapaatip-akunneri pingasut kingulliit ingerlanerini ikittuinnaasimammata, inuit 100.000-ilikkaat nerisassassaqanngitsut, tuluit aviisiat The Guardian nittartakkamini allaaserinnippoq.
Skrevet af Mads Lynge
Naatitanik katersinerit sapaatip-akunnerini tulliuttuni iluatsissanngippata inuit millionilikkaat ajornartorsiulissasut, tamat inuussutissaqarnissaannik Naalagaaffiit Peqatgiit pilersaarusiortui nalunaaruteqarput.
Ikiuiniaqatigiiffiilli Zimbabwemut isersinnaatitaannginnerat Zimbabwep præsidentiata Robert Mugabeb aalajangiusimavaa, taamalu ajornartorsiutit annikillinaviaratik.
Zimbabwemi nerisassaqarniarnikkut ajornartorsiutit kingunerisaannik inuit amerliartuinnartut Sydafrikamut qimaasut allaaserineqarpoq.