Tassa aalisagaq siornatigut takuneqareernikkuugaluartoq aatsaat imartatsinni siumorneqarpoq. Japanimiut ilisimatuut misissuitillutik 1988-imi pisareqqaarpaat, taamaammallu ilisimatooq, Dr. Kaoru Kido atsiullugu, Kidos-imik taaguuserneqarsimalluni, latiinerisutulluunniit Careproctus kidoi.
Taannali taajuminaappat aalisakkap sarajannera pissutigalugu qallunaatut inuppalaarnerusumik taaguuteqarpoq tassa; Snotfisk, kalaallisuunngorlugu; Kakkik.
Aalisagaq itisoormiuuvoq Baffinip kangerliumarngani 1000 meterisut ititigisumi nassaarineqarsinnaalluni.
Pinngortitaleriffimmeersut Kakkinnik arlalinnik pisaqareerput, 20-llu Danmarkimi Uumasunut katersugaasivimmi aalisakkat misissugassat akornanniipput.
Kakkik nittartakkatsinni, knr.gl-imi takuneqarsinnaavoq.