Argentinami sikumi sullorsuaq iigartoq
Argentinami ukiorisseruttoraa sikumi sullorsuup ippassaq iigarneranut nunarsuarmi silap kissatsikkiartornera pissutaanersoq ilisimatuut oqallisigaat.
Skrevet af Louise M. Kleemann
10. juli 2008 07:42
Sikumi sullorujussuaq pineqarpoq, sulloq taanna Argentinami sermimi tusaamasamiittoq ukiut sisamakkaarlugit tallimakkaarlugilluunniit iigartarpoq, pinngoqqittarlunili. Sullorli taanna qaqutigooqisumik maanna tassa iigarpoq.
Sermip iigarnera alutornartoq nalinginnaasumik aasakkut septembarimiit maajip tungaanut nunarsuup affaani kujallermi pisaraluarpoq, sermerlu tatsimut Argentinomut iigartarluni, Perino Morenomulli takornarniat alutornaqisumik ippassaq misigisaqarput, sulloq tassanngaannaq nakkaammat.
Nunarsuarmi silap kissatsikkiartornera sermip iigarneranut pissutaanersoq, allamilluunniit nassuiaatissartaqarnersoq, ilisimatuut maanna oqallisigaat.
Unnia sulloq 1917-imi ukiukkut aamma aserorsimasoq, kingumullu 1951-imi ukiukkut.
