Sanasut aqutsisutut Kalaallit Nunaanni ilinniarsinnaalerput
Aqutsisutut ilinniarniartut Danmarkimut siullermik ilinniariartaraluarput. Modulilli siulliup Kalaallit Nunaanni oktobarip ulluisa arfernganniit qulingannut pinissaa maanna neqeroorutigineqarpoq, modulip tullia aappaagu 2009-mi upernaakkut, pingajuat aappaagu ukiakkut, kiisalu kingulleq 2010-mi upernaakkut ingerlanneqassaaq.
Sulisitsisut Peqatigiiffiata, Sisimiuni Sanaartornermik Ilinniarfiup taavalu Danmarkimi kattuffiit marluk, Dansk Byggeri aamma EL- og VVS-Installatørernes Sammenslutning suleqatigiinnerisigut sanasut aqutsisutut Kalaallit Nunaanni ilinniartalernissaat iluatsippoq. Aqutsisutut ilinniarneq sanaartornermut tunngasunik tunngaviusumik ilisimasaqarluartunut, suliffeqarfinni aqutsisutut sulinissamut suli annertunerusumik paasisaqarusuttunut, tulluartuuvoq.
