Namminersorneq pillugu isumaqatigiissuut pitsaasuuvoq
![](/sites/default/files/styles/image_934x467/public/article_images/ias_ungdom_03.jpg?itok=mcK6XOe_)
Inuusuttut Ataqatigiit isumaqarput namminersorneq pillugu isumaqatigiissut, kalaallit qallunaallu suleqatigiinneranni maannamut angusat pitsaanersarigaat, isummanullu qanganitsanut pituttorsimasuunani nutaaliornerusoq.
Inuusuttut Ataqatigiit tikkuarpaat, Demokraatit Namminersorneq pillugu Isumalioqatigiissitami ilaasortaatitaqartuaannarnikuummata. Taamaattumik Demokraatit naaggaarniarnerminnut tunngavigisatik itisilerlugit nassuiartariaqaraat oqaatigineqarpoq.
- Inuiattut akuerisaaneq aningaasanngorlugu nalilerneqarsinnaanngilaq, Demokraatit tamanna paatsoorujussuarsimavaat, Inuiattut akuerisaanissap ukiorpassuarni anguniarneqarsimaneranut tamanna nikassaataavoq angisooq, Inuusuttut Ataqatigiit allapput.
Demokraatit siulittaasuattut tunuartinneqartoq, Per Berthelsen, Namminersorneq pillugu Isumalioqatigiissitami partip ilaasortaatitarisaa Jens B. Frederiksenip oqaasii ullumi aamma oqaaseqarfigai.
- Namminersornermut naaggaarniaraanni tamanna Dansk Folkepartimik illersuineruvoq, Per Berthelsen allappoq, Demokraatillu isummaminnik allanngortitsiniarnerat qinersisartunit qisuariarfigineqarnissaa neriuutiginerarlugu.