Jens B. Frederiksen siunissamut isumalluarpoq
Demokraatit immikkut ittumik ippassaq ataatsimeersuarmata Jens B. Frederiksen Demokraatit siulittaasussaattut qinerneqarpoq. Naak siulittaasutut qinerneqarnini nuannaarutigigaluarlugu, sulinissaminullu qilaanaraluarluni, Demokraatit iluminni upernaaq manna avissaartuunnerat oqaaseqarfiginngitsoorumanngilaa.
Skrevet af Louise M. Kleemann
09. juli 2008 06:59
- Soorunami tujorminarsimavoq, aamma pisimasut uagut tulluusimaarutigisinnaanngilagut. Ajornartorsiutit ilutsinni, eqqissisimasumik aaqqinniarsimasussaagaluarpavut, ajoraluartumilli taamatut pisoqarsimanngilaq, Jens B. Frederiksen oqarpoq, nangillunilu:
- Demokraatit malittarisassaat pisariaqartumik aaqqiivigineqartariaqartut piffissap kingulliup ingerlanerani paasivarput.
Immikkut ittumik ataatsimeersuarnermi siulittaasussarsiortoqarmat Jens B. Frederiksen 14-init qinerneqarpoq, maannamullu siulittaasuusimasoq Per Berthelsen qinerneqarani. Qinersinermi taasivissaq ataaseq allaffigineqanngilaq.
