Efterskolini misilitsittoqassanngilaq
Kisiannili atuartut ilinniaqqiffinnut ingerlaqqiffiusussani piumasaqaatit naammattusarniarlugit kommunerisami meeqqat atuarfiat isumaqatigiissuteqarfigalugu misilitsinnissamut periarfissaqartut Kultureqarnermut ilinniartitaanermullu nakkutilliisoq Kaali Olsen oqarpoq:
- Tunngaviatigut uku efterskolit misilitsitsiviusussanngillat, kisiannili atuartut tikippata ataasiakkaarlugit oqaloqatigineqartassapput paasiniaaffigalugit, atuartup efterskolernermini suna atorfissaqartinneraa; assersuutigalugu GU-mut isernissaminut tuluit oqaasiini angusamigut qaffassarniaruni, taava atuartup piumasarisinnaavaa tamanna kissaatigiguniuk, tamanna meeqqat atuarfianut nalunaarutigeqqullugu, Kaali Olsen nassuiaavoq.
Misiliutitut efterskolernissat Qaqortumi Sulisartut Højskoliata, Sisimiunilu Knud Rasmussenip Højskoliata ataani ingerlanneqartussat, naalakkersuisut 22,5 million koruunit aningaasaliinerisigut atuartut katillutik 254-it nunatsinni efterskolersinnaanngorput. Maannamut illoqarfinni sisamaasuni efterskolertoqalernissaanut killiffik eqqarsaatigissagaanni tamanna isumalluarnartut Kaali Olsenip aamma oqaatigaa, ilaatigut Qaqortoq aallartinnissaminut piareereersimasoq, Maniitsumi Sisimiuni Kangerlussuarmilu aamma efterskolertunik aallartittoqassasoq aamma oqaatigaa.
Ilinniartitsisussaqarnikkut pissutsit qanoq inissisimanersut apeqqutigigatsigu Kaali Olsen isumalluaqisoq ima oqarpoq:
- Maannakkut inissisimanerput pitsaasorujussuuvoq, Qaqortumi Sisimiunilu ilinniartitsisut atorfissaqartitatik pissarsiarereernikuuaat, Maniitsumi ataaseq amigaatigineqarpoq, Kangerlussuarmilu marluk amigaatigineqarlutik. Kisianni isumalluarnartorujussuuvoq, soqutiginnittut arlalissuit saaffiginninnikuugamik, Kaali Olsen Namminersornerullutik Oqartussani Ilinniartitaanermut nakkutilliisoq naggasiilluni taama oqarpoq.
