Ujaqqanik erlinnartunik piiaaneq 100.000 koruuneqarpoq

Ujaqqanik erlinnartunik soorlu rubiininik katersillunilu tuniniaaniaraanni ullumikkut 100.000 koruuninik akeqarpoq. Maannakkut Aatsitassanut pisortaqarfik ujaqqanik erlinnartumik soqutigisalinnut najoqqutassanik nutaanik sanasoqarpoq, periarfissallu akikinnerulerlutillu pisariinnerulissasut Aatsitassanut pisortaqarfimmi aatsitassanut immikkoortortaqarfimmi pisortaq John Telling oqarpoq.

- Inuinnarnut periarfissiiniarluta najoqqutassanik nutaanik sanavugut, uku suliffeqarfissuit kisimik maannakkut periarfissaqaramik aningaasartuutit annertunermik. Taakku najoqqutassat marlunnik periarfissiissapput. Siulleq inuup nammineq piiaasinnaanermut akuersissutaa kisermaassaanngitsoq, imatut paasillugu; taanna nunaminertaq piiaaffiusoq aamma allanit akuersissummik pisisoqarsinnaalluni. Saniatigut aamma isumannaallisaanissamut pinngortitamullu piumasaqaatit annikinnerussallutik, atortorissaarutillu atorneqarsinnaasut killeqassallutik, John Telling nassuiaavoq, nangillunilu:

- Suli aalajangivinngilarput qanoq annikitsigisumik akuersissutit akeqalissanersut, kisianni kisermaassaanngitsoq akisoorujussuussanngilaq, taamaalilluni kinaluunniit akuersissummik pisinnaaniassammat. Kisianni kisermaassaq soorunami akisunerutilaassavarput, piumasaqaatit tassani allaagamik uagutsinnullu aningaasartuutit annertunerussallutik. Maannakkut misissuinissamut akuersissut 25.000 koruuninik aningaasartaqarpoq, - taamatut akeqarpoq, saniatigullu aamma aningaasartuutit atugassat annertungaatsiarlutik. Piianissamut akuersissut 100.000 koruunimik akeqarpoq, saniatigullu pinngortitamut isumannaallisaanermullu piumasaqaatit pissutaallutik aamma aningaasartuutit annertungaatsiartarlutik, John Telling nassuiaavoq.

Najoqqutassanik sooq sukateriniartoqarnersoq apeqqutigigatsigu John Telling oqarpoq sukaterinatik:

- Sukaerinngilagut, inatsisit pioreersut najoqqutaralugit suligatta! Ukua rubiinit §32-p iluani katersorneqarsinnaannginneri ajornartorsiortitsipput, ukiunilu kingullerni tusarsaaleraluttuinnarlutik. Taamaammat najoqqutassat ukua nutaat sanavagut inuinnarnit tamakku aamma katersorneqarsinnaaniassammata, taama

Aatsitassanut pisortaqarfimmi aatsitassanut immikkoortortaqarfimmi pisortaq John Telling naggasiilluni oqarpoq. Ilanngullugu oqaatigaa najoqqutassat nutaat ukiaru oktobarimi atulernissaat naatorsuutigigitsik.

Najoqqutassat pisariinnerulersinniarneqaraluartut

Nuummi ujaqqerituut peqatigiiffianeersoq, foreningen af d. 16 augustimeersoq Niels Eske Madsen isumaqarpoq ujaqqanik erlinnartunik katersisinnaanermut najoqqutassat ersernerluppallaartut. Aamma isumaqarpoq, nunatsinni nunaqavissut ujaqqanik erlinnartunik nassaartut isertitaminnik nalunaaruteqarnermikkut akileraaruteqartartussaammata periarfissaq tamanna ajornartinneqartariaqanngikkaluartoq.