Nunarsuarmi piitsunik ikiuinissamik EU-p neriorsuutaa G-8-t eqqartorpaat
G8-nik taasat siornatigut neriorsuutitik eqquutsissinnaasimanngilaat, tassami ukioq 2010 tikitsinnagu ukiumut nunanut piitsunut tapiissutigisartakkatik marloriaatinngortissallugit neriorsuutigereeraluarlugu, ukioq 2007-imi nunarsuarmi ikiuiniarnermi naatsorsuutit takutippaat, ikiorsiissutit 8 procentimik appariarsimasut.
EU-kommissionimi siulittaasoq, Jose Manuel Barroso, tusagassiortunik ullumi katersortitsinermi oqarpoq, EU-mi nunalerinermut tapiissutit atunngitsuukkat 7,45 milliardi koruunit nunanut ineriartortitassanut tunniunneqassasut, tamannali pissappat EU-mi nunat akuerseqqaartariaqarput.
Akuerseriarpata, inuussutissanik pilersuisoqalissaaq aamma silap pissusaata nunalerinermut ajoqusiinissaa ilimanassappat ikiuiniartoqarumaarluni.
Nunarsuatsinni inuussutissat akiisa akitsupiloornerat eqqissiviilliuutaajuartoq aamma oqaatigineqarpoq.
G-8-nik taaneqartartut tassaapput Frankrig, Tyskland, Italia, Japan, Tuluit Nunaat, USA, Canada aamma Rusland.
EU G-8-mi ataatsimiittoqaraangat allat naligalugit ukioq 1977-imili issiatitaqartarpoq.