Pissutsit taamaannerat qaanaarmiunut kinguneqapiluppoq. Takornariaqarpianngilarmi, tikeraat sulinngiffeqartullu pisarnermit ikinnerullutik. Pikkorissarnernut, ilinniaqqinernut ataatsimiinnernullu peqataasinnaasannginnerit sunniutaapput, kiisalu timmisartup imaqarsinnaanera killeqarmat assartugassat kingusinaakkajupput.
Air Greenland ilisimatitseqqaarani, kiffartuussinissamullu isumaqatigiissut unioqqutillugu, Qaanaamut timmisartuussisarnini 2006-imi marsip qaammataani affaannanngortippai, tassa sapaatip akunneranut marloriarluni timmisartuussisariarluni ataasiaannartalerluni.
Kommunimiit nalunaarput Air Greenlandimut Naalakkersuisunullu siornatigut saaffiginnittarsimagaluarnerit kinguneqarsimanngitsut.
Qaanaami borgmesteri, Jens Danielsen oqarpoq, assigiinngitsut minneruffissaat aallaaviginagit, Air Greenlandip tunniusimanerulluni kiffartuussilluarnerunissaanut kaammattuinerusumik, kiffartuussinermut isumaqatigiissusiorfiginissaa eqqarsaatigineqartariaqaraluartoq.