Akissarsialerinermut atortut miliuuninik qaffapiloorput
Aningaasartuutit qaavisigut aningaasartuutaasussat 3,9 miliuunit koruuniusut, suliassamut aningaasartuutissatut missingersuutaaqqaartut marloriaataanit amerlanerupput. Sermitsiap nittartagaani taama allaaserinnittoqarpoq.
Inatsisartut aningaasaqarnermut ataatsimiititaliaata aningaasartuutissat tallimanngormat ataatsimiinnermini akuersissutigai. Aningaasaliissutaareersut qaavisigut akuersissuteqarnikkut atortut nutaat katillugit 7,5 miliuunit koruuninik akeqarnissaat naatsorsuutigineqarpoq. Aningaasaqarnermut ataatsimiititaliap aningaasaliissutissat akuersissutigigaluarlugit pisut assut isornartoqartippai.
- Aningaasaliissutaareersut qaavisigut aningaasaleeqqinneq kommunini nutarterinermi IT-mut aningaasartuutissat akuersissutaareersut saniatigut aningaasaleeqqinneruvoq. Naalakkersuisut nutarterinerup pilersaarusiorneranut atatillugu aningaasanik pisariaqartitsinermut atatillugu ilisimaarinninnerusimannginnerat assut isornartoqartinneqartoq, ataatsimiititaliaq naalakkersuisunut akissummini ilaatigut allappoq.
- Ataatsimiititaliap erseqqissassavaa, atortussanut nutaanut immikkut aningaasaliissutit naammanngitsut paasinarsissagaluarpat, tamanna nassuiaatissaqarluartariaqartoq, ataatsimiititaliaq ilanngullugu allappoq.