Nick Nielsen K2-mut qaqinialeruttorpoq
Nick Nielsen K2-p eqqaaniittoq attaveqarfigaarput, imatullu oqarpoq:
- Maanna tupersuaqarfimmiippugut, 5100 meterinik portussusilimmiilluta. Camp 1-imut qullarterniartussaavugut, 6000 meterinik portussusilimmiittumi. Taanna suliariartussavarput. K2 nunarsuarmi qaqqat ulorianarnersaattut nalilerneqartarpoq, Nick Nielsen oqarpoq.
K2 8611 meteritut portutigivoq, juulillu naajartulernerani K2 qaqissagitsik Nick Nielsenip ilimagaa, qaqqarsuarmilli qaqisiniarneq ajornaatsuinnaanngilaq:
- Maanga ingerlaarnitsinni napparsimasorujussuuvugut, naarlulluta. Massakkulli ingerlalluarpugut, Nick Nielsen oqarpoq.
Inuit 100-t allat peqatigalugit K2-mik qaqisiniarput.
Nick Nielsen nunarsuarmi qaqqat portunersaannut Mount Everestimut siornatigut qaqereerpoq.