Uuliaarluertoqanngilaq
Sinerissami nakkutilliissutip ‘Vædderen’-ip Qeqertarsuup kitaata avannaanut immamut ullumikkut misissuiartoqqammersup, uuliamik mingutsitsisoqarsimasinnaanera uppernarsarsinnaanngikkaa, Kangilinnguani sakkutooqarfiup nalunaarutigaa.
Skrevet af Elisa Isaksen
26. juni 2008 16:56
Taamaattorli nakkutilliissutip qulimiguuliata sumiiffiit sisamat, kajorujuttunik qalipaatillit, qitermikkut 20 imaluunniit 30 meterinik silissusillit nassaarisimavai.
Misiligutissanik tigusisoqarmat, kajorujuttoq tamaaniittoq uuliarsunninngitsoq paasineqarpoq. Taamaattumik kajorujuttup tamaaniittup quajaatineersuunissaa ilimagineqalerpoq.
Tamanna qulakkeerniarlugu misiligutissatut angerlaanneqartut misissoqqissaarneqassasut, Kangilinnguani sakkutooqarfimmiit nalunaarutigineqarpoq.
