Imminortoqartillugu qimagaasut oqaloqatiginnittarfiat pisariaqartinneqarpoq
Arnaarannguaq Andersen-ip ernera ukiut arfineq marluk matuma siorna 15-inik ukioqarluni imminorluni toquvoq. Tamanna akueriuminaakkaluaqisoq oqaloqateqartarnermigut aliasuutini qaangeriartorpaa:
Arnaarannguaq Andersen-ip ernermi imminorluni toqunera ukiut arlallit matuma siornatigut, imminut suliarinermigut akueraa, akueriuminaakkaluaqisoq. Oqaloqateqartarmigut paasivaa tamanna akuerisariaqarlugu. Imminorsimasunit qimagaasut imminoriarsimasullu oqaloqatiginnittarfianni, ikorfartoqatigiinni, Arnaarannguaq aliasuutini suliaraa aammalu tarnip pissusaanik ilisimasalinnik oqaloqateqartarluni. Imminornaveersaartitsinermik suliaqarnermik pikkorissaqataavoq, paasissarsiorlunilu.
Arnaarannguaq aliasunnermini kisimiinnaveersaarpoq, tamannalu iluqutigivaa, nukittoqutigalugulu.
“Imminortoqarsimatillugu qimataasut oqaloqatiginnittarfiannik saaffigisinnaasaannillu amigaateqarpoq, qimataasimasullu amerlapput oqaloqatiginnittarfimmik pisariaqartitsisut, nipangiinnartullu “ Arnaarannguaq Andersen oqarpoq.
Artorsaateqaruit oqaloqatissannillu pisariaqartitsiguit, Paarisap oqarasuaatikkut siunnersuisarfianut telefon 134-imut sianersinnaavutit. Telefon 134 unnukkut arfineq marluniit qulingiluat tungaanut sianerfigineqarsinnaavoq, atermillu taasinngikkaluarluni siunnersortittoqarsinaalluni.
KNR-ip nittartagaani KNR naggat GL-imi saaffigineqarsinnaasut takuneqarsinnaapput.
