Silap pissusaata allanngornera sukkasimavoq
Tamanna Københavnip Universitetiani Niels Bohr Institutimi ilisimatusartut maanna paasivaat.
Taakkua nunatsinni sermersuarmi qillerinerit misissoqqissaarnerisigut paasivaat, nunarsuatsinni sermersuaqarnerata kingornagut silap pissusaata allanngornera ukiualuit ingerlanerinnaani pisimasoq.
Ilisimatuut tupaallaatigeqisaminnik paasivaat, tupinnaannartumik sukkasuumik taamanikkut sila allanngoriartupiloorsimasoq.
- Silap allanngoriartornera ima allanngoriapiloorsimatigaaq soorlulusooq toortagaq tuuginnarneqarsimasoq.
Silap pissusaata allanngoriapiloorsimanera Atlantikup avannarpasinnerusuani erseqqarikkaluaqisoq, taamaattorli allanngornerit nunanit kiattunit aallaaveqartut misissuinitsigut paasivarput, ilisimatooq Dorthe Dahl Jensen ritzauimi taama issuarneqarpoq.
Paasisat tamakkua atuagassiami ilisimatusarnermik sammisaqarfiusumi Sciencemi saqqummiunneqarput.