Sikaritsit qamitakut 48 kiilut Upernavimmi katersorpaat
Illoqarfiup salinneqarnissaa sioqqullugu, innuttaasut hunnorujut pallillugit amerlassusillit sikaritsinik qamitakunik katersipput. Unammisut periarfissinneqarput, nalunaaquttap akunnerani ataatsimi minutsinilu 45-ni katersinissaminnut. Meeqqat inersimasullu unamminermi misiligutaasumik ingerlanneqartumi peqataapput.
Magdaline Berthelsen Svendsen unamminermi ajugaavoq. Taassuma sikaritsit qamitakut 3 kiilut 50 gramillu katersorpai, tusind koruninillu akissarsilluni.
Unamminermi normu 2-nngorpoq Sofie Rosa Geisler Petersen taassuma qamitakut 3 kiilut katersorpai. Normu 3-nngortullu marluupput, tassaasut Ole P. Johansen aamma Arnajaraq Jensen, taakkua 2 kiilut 50 gramillu katersorpaat.
Upernaviup illoqarfiani sikaritsit qamitakut katillugit 48 kiilut 53 gramillu arfininngormat katersorneqarput, Upernavimmi Arnat Peqatigiit siulittaasuat Anine Mørch oqaluttuarpoq, meeraq isumassarsisoq Diplom-mik 200 koruuninillu akissarsitinneqartoq. Upernavimmi unammisitsineq illoqarfinni nunaqarfinnilumi allani unammissutigissallugu isumassarsiatsialaasinnaavoq.
