Røde Kors poortugarsititsissaaq
Nunatsinni Røde Korsip aamma Nuummi Røde Korsip immikkoortortaata, ilaqutariit atugarissaannginnerusut 139-nik meerartaqartut, meerartaasa juullimi poortugarsitinneqarnissaat isumaginiarpaa.
Skrevet af Elisa Isaksen
21. december 2008 15:45
Nuummi Røde Korsip atornikuerniarfiani nammineq kajumissutsiminnik suleqataasut ilaqutariinnut ikiortarialinnut 100.000 koruunit nalinginut tunissutissarsiniutissanik suliaqarsimasut, Webaviisimi allaaserineqarpoq.
Nuummi Røde Korsip siulittaasua Otto Albrechtsen oqarpoq, ilaqutariippassuit inuuniapiloortut takusarlugit, inigisaminnut akiliutissatik qaffaseqisut, innaallagissamut akiligassat qaffakkaluttuinnartut, akissarsiatillu appaseqisut ilungersuutigalugit inuusut.
Taamatut atugaqaraluarlutik, isumaginnittoqarfimmit ikiorserneqarnissaminnik qinnuteqarneq ajorput, soorlu taamatut atugaqartut tassaasinnaallutik ilinniagaqartut mikisunik meerallit imaluunniit angajoqqaat kisimiittut.
