Atuakkiortoq: Danskit kalaallinik isiginninnerat ingasaassiniarneruallaarpoq
Kim Leine isumaqarpoq danskit Kalaallit Nunaat pillugu isummersortarnerat ingasaassiniarneruallaartoq allanngortinneqartariaqalersoq, ulluinnarni inuuneq tutsuiginarnerusumik eqqartorneqartalersillugu.
- Kinaluunniit akunnialunnguani Kalaallit Nunaanniissimasoq isummersuutinik sakkortuunik naapitaqartarpoq, soorlu "pinngortitap tupinnaannartumik kusanarnerujussua", illuatungaatigullu "inuit ajornartorsiutaat naalliunnartut". Taakkualu, kusaginnineq illuatungaatigullu nalligusunneq nikeqattaallugit eqqartorneqakkajupput, akornanni pisut ulluinnarpalaartut eqqaaneqarpiassanatik.
Kim Leine oqaluttuarpoq nammineq nunaqarfinni najugaqartarnermini kalaallit qanoq qanilaartuullutillu ilakkuminartigisut nalunagu, tamannalu soorlu danskit ilinniutigisinnaagaluaraat.
Naluara sooq danskit taama isummersornerminni ileqquliutiinnakkaminnik ingasaassiniartigisarnersut, imaassinnaavoq nunasiaatilittut ilerasuuteqartaramik, naak allanut nunasiaateqarsimasunut sanilliullutik danskit ilerasuuteqarnerusariaqanngikkaluarlutik.
- Kalaallimmi ilakkuminartuullutillu qanilaartuullutik, ulluinarni susassaqaqatigiillutik imminnut pulaaqattaallutik pisarnerat eqqaaneqarpiarneq ajormat uggornaqaaq, Kim Leine oqarpoq.