Taaseqataasinnaanermut pikkorissartut
Politikkikkut aalajagingassat politikerit ataasiakkaat qanigisaannut susassaqarfiinullu tunngassuteqartut oqaluuserineqartillugit politikerit qaqugu taaseqataassappat qaqugulu taaseqataassanngillat? Apeqqutit taaseqataanissamut tunngassuteqartut Kommuneqarfik Sermersuumi Ikaarsaariarnermi Ataatsimiititaliami ilaasortat ullut kingulliit sammivaat.
Skrevet af Louise M. Kleemann
17. december 2008 07:19
Pikkorissarnermi ilaatigut inatsisartut inatsisaat taaseqataasinnaanermut tunngasut nassuiarneqarput.
Kommuneqarfimmi sulisuuneq aamma qinikkatut inissisimaneq ataatsimoorpata taaseqataasinnaanermut apeqqut inuup eqqumaffigisariaqarai oqaatigineqarpoq. Inuiaqatigiit ikinnerput pillugu ilaqutariinnikkut, suleqatigiinnikkut, aningaasarsiornikkut allatigullu immitsinnut ilisarisimasarnerput eqqaaneqarpoq.
- Aalajangiiffissani qaqugukkut taaseqataasarnissarput Kommuneqarfik Sermersuumi sulinitsinni uteqqiaffigiuassavarput qulakkeerniarlutigu kikkunnilluunniit pituttorneqarnata aamma tunngaveqarluartumik aalajangiisarnissarput, Asii Chemnitz Narup Ikaarsaariarnermut Ataatsimiititaliami siulittaasoq oqarpoq.
