Savalimmiuni akileraarutit qaffaqqittariaqalersinnaapput
Savalimmiuni akileraarutit qaffaqqittariaqalersinnaapput imaluunniit illuuteqarnermut akileraaruteqalersitsisoqarsinnaalluni, taama Ritzau allaaserinnippoq.
Savalimmiuni aningaasarsiorneq pillugu siunnersuisartut nalunaarusiaminni kingullermi politikerit akikussaasut uparuartorpaat, oqarlutik politikerit akileraarutikillisaaniaannarpata Savalimmiut aningaasaqarniarnerata aserorluinnarnissaanik siunnersuisartut mianersoqqusillutik oqaasii tusaaniarneqarsimanngitsut. Siunnersuisartut erseqqissaatigaat Savalimmiut karsiata amigartooruteqarneranut taannarpiaq pissutaaqataasoq.
- Naalakkersuisuusimasut akileraarutikillisaasimanngikkaluarpata nunarsuarmi aningaasaqarnerup ajalusoornera Savalimmiunut taamarsuaq eqquissanngikkaluarpoq, siunnersuisartut oqarput.
Savalimmiut karsiata aappaagu amigartoorutai 570 millioni koruuniussangatinneqarput. Taamaammat Savalimmiuni aningaasarsiorneq pillugu siunnersuisartut illuutillit akileraartittalernissaat isertitaqarnerulernissamut periarfissaasoraat. Taannali politikerit maannamut tusaajumanngittuarsimavaat.
Siunnersuisartut aamma siunnersuutigaat, saavalimmiuni innuttaasut illutaarniarlutik atorniarsinnaasut ikilisarneqassasut, sanaartornerit akilersinnaanngitsut amerlavallaarsimammata.