Ujarassiorimut nassiussat tamangajammik uranitaqarput
Arent Heilmann Ujarassiorimmik suliaqarnermi nassiussanik ukiuni arlalissuarni misissuisarpoq, ujaqqallu nassiussat tamavimmik uranitaqartarput, uran aamma thorium ilaasarmata.
- Nunatsinni aatsitassarsiornermi ujaqqat qanoq uraneqartigisinnaanerat aalajaginngikkutsigu, aatsitassarsiornissaq ajornarsisinnaavoq, ujarassiooq oqarpoq isumaqarporlu, nunatsinni aatsitassanik piiaaneq nikeriaqqissappat, aatsitassat mikisunguungaluamik uranitaqarsinnaanerat politikikkut akuerineqartariaqartoq.
Aatsitassat piiarneqartut uranitaqanngilluinnarnissaat ukiut 20-it 30-it missaat qaangiuttut tunngaviusumik isummerfigineqarmat, ujaqqanik misissuinermik atortorissaarutit ullumikkut atorneqartutut pitsaatiginngillat, taamanilu ilisimaneqanngilaq, ujaqqat assigiinngitsut amerlanersaat uranitaqarsinnaasartut.
- Massakkulli tamanna ilisimavarput, politikerillu ilisimasat aallaavigalugit aalajangertariaqarput, Arent Heilmann oqarpoq. Taassuma uranitalimmik piiaasinnaanermut akerliusut ataqqilluinarpai, oqarlunili isumannaallisaanermut malittarisassat sukaternissat massakkut oqallisigineqartariaqartoq.
- Avatangiisit sulisullu qanoq sunnerneqassanersut eqqumaffigisariaqarparput, aatsitassarsiorfiullu suugaluartorluunniit mingutsitsinissamut killilersuiffiginissaa pingaarluinnarpoq. Inatsisit ajunngikkaluarput, kisianni amigaataapput mingutsitsinermi isumannaallisaanerlu eqqarsaatigalugu malittarisassat, ujarassiooq Arent Heilmann oqarpoq.
