Inatsisartut siulittaasuat Ruth Heilmann, inatsisartunut ilaasortat ilaasortaqatiminnik peqanngitsunik taasissussisarsimanerat pillugu novembarip ulluisa aqqaneq-aappaanni 2008 radioaviisimut oqaraluarpoq taasissussisoqartarsimanera ilisimasaqarfiginngikkini, naammagittaalliortoqassappalli suliariumaarini.
Nutaarsiassaqartitsivimmili paasivarput Naalakkersuisunut ilaasortaq Kim Kielsen oktobarip ulluisa 15-ianni 2008 Ruth Heilmannimut allassimasoq oqarluni, Emilie Olsenip Kuupik Kleist ulloq taannarpiaq taasissussimagaa.
Aamma paasivarput novembarip 20-ani 2008 Ruth Heilmann Emilie Olsenimut allassimasoq, Emilie Olsenip taasissussisimanini pillarneqaatiginavianngikkaa, Emilie Olsen nammineq aamma paasitinniarluarsimammagu unioqqutitsilluni.
Inatsisartut inatsisaat nr. 11 20. Oktober 1988-meersup naapertorlugu ”Inatsisartuni ilaasortat Inatsisartut taasinerinut taamaallaat peqataasinnaapput nammineerlutik najuukkunik”.
Inatsisartut siulittaasuat Ruth Heilmann tamanna pillugu oqaaseqartinniaraluarparput, suliarli inunnut ataasiakkaanut tunngassuteqarmat oqaaseqarumanngilaq.