Nukissiorfiit Aktieselskab-inngornavianngilaq
Aningaasanut inatsisissatut siunnersuut allanngorlugu naalakkersuisunit aqagu saqqummiunneqassaaq, allannguutissatulli siunnersuutigineqartut Inatsisartut Aningaasaqarnermut ataatsimiititaaliaannit tamakkiisumik tapersersorneqanngillat.
Skrevet af Jaaku Lyberth
13. november 2008 16:21
Inatsisartut Aningaasaqarnermut ataatsimiititaliaa Aningaasanut inatsisissatut siunnersuummut ilassutitut isumaliutissiissummik, 32-nik quppernilimmik, saqqummiussaqarput.
Allannguutissatut siunnersuummi Nukissiorfiit ilaatinneqassapput. Tamanna pissutigalugu Nukissiorfiit aktieselskabinngortinneqarnissaa siunnersuut taama isikkoqartillugu piviusunngornavianngilaq, naak naalakkersuisut Nukissiorfiit aktieselskabinngortinneqarnissaat piumasarigaluaraat.
Nukissiorfiit aningaasanut inatsisissatut siunnersuummi ilaatinneqarnerat pissutigalugu amigartoorutit 306,2 millioni koruuniussapput, siunnersuut siullermeerneqarmat amigartoorutigineqartussatut siunniunneqartut 440,9 millioni koruuniusut.
