Kuupik Kleist: Naalakkersuisut paatsiveerusimaarnerat nukillalaarnarpoq
Namminersorneq pillugu taasisitsinissaq pissutigalugu maannakkut qinersinissaq piviusunngorsinnaanngilaq, paatsiverussataassammat, Kuupik Kleist oqarpoq.
Inatsisartut ataatsimiinneranni paatsiveerusimaarneq partiimini iluaagalugu ersertuutinngilaa. Naalakkersuisut Namminersornerullutillu Oqartussat ingerlatsinerat nukillalaarnarnerarpaa, ilaatigut naalakkersuisuni ilaasortat arlallit inatsisartuni ilaasortanit paasissutissanik pisariaqartinneqartunik tunniussisimannginnerat innersuussutigalugu.
Kuupik Kleist isumaqarpoq, novemberip ulluisa 25-ianni taasinissamut ullumikkut pissutsinut paatsuunganarnerannit eqqugaasoq, inuit taasinissaq taanna maannakkut naalakkersuisuusunut akerliunerminnut atoratarsinnaammassuk.
Demokraatit isumaqarput, Namminersorneq pillugu taasisitsinissaq utaqqinagu maannakkut inatsisartunut qinersisoqartariaqartoq, Demokraatit politikkikkut oqaaseqartittagaasa siulittaasuata tullia Palle Christiansen aviisimi Sermitsiami apersorneqarluni oqarpoq.
Aningaasanut inatsississaq aappaagumut atuuttussaq inatsisartut ullumi ataatsimiinneranni oqallisigineqassaaq, partiillu akornanni sakkortuumik oqallittoqarnissaa naatsersuutigineqarpoq.
