Takornarialerisut: Piniartut tammajuitsussarsiniartitsisalernissamut piukkunnanngillat
Inuit Ataqatigiinnit siunnersuutigineqartoq piviusunngussappat tammajuitsussarsiniarluni piniartitsisarnerup ineriartortinneqarnera unittuussasoq, Kalaallit Nunaani Takornariartitsinermi Inuussutissarsiornermilu siunnersuisoqatigiinni ineriartortitsinermut pisortaq Mads Daniel Skifte isumaqarpoq.
- Suliffeqarfitsinninngaaniit tamanna nangaanartoqartipparput, tammajuitsussarsiniarluni takornariaqarnerup unittoorsinnaanera pissutigalugu, Mads Daniel Skifte, ernumateqarpalulluni oqarpoq.
- Isumaqanngilagut piniartut aalisartulluunniit piniaqataatinneqarsinnaanngitsutut isigineqassasut, kisianni eqqaamasariaqarpoq taakku avammut tuniniaaneq, piseqqusaarnerlu kiisalu takkukkumaartussanut allatut oqaasilinnut attaveqarsinnaasariaqarmata.
Aamma takornarianik piumasaqaateqaqisunik aningaasarpassuarnillu akiliisimasunik kiffartuussinissamik ilisimasaqartariaqarput, Mads Daniel Skifte oqarpoq.
Piniartut aalisartullu kisianni atorfissaqarsinnaasorineqarput:
- Piniaqataaneq, tassa tamanna allat oqaasiinik pisariaqartitsivissunngimmat. Tamajuitsussarsiorluni piniartoq tikkuunneqarsinnaasariaqarpoq piniagassaq suna aallaassaneraa, Mads Daniel Skifte oqarpoq.
