Miki Nuummit aallariartussamaartoq aperaarput sooq X-Factorimut peqataarusulersimanersoq.
- Kalaallit Nunaaninngaanniik anilaarlunga allamut pillunga aliikkusersuerusukkama, aamma neriuutigalugu inuit amerlanerusut Danmarkimi massakkuugallartoq appakaaffigisinnaassallugit, tassami inuppassuarnik aliikkusersuineq nuannarigakku, Miki Fencker Thomsen taama oqarpoq.
Taanna aperaarput sooq auditionimi kalaallisut erinarsorniannginnersoq.
- Imaassinnaavoq Kalaallisut erinarsortunga. Soorunalimi Kalaallisut erinarsortassaanga. Ullut arlaanni saqqummersitsileruma naatsorsuutigaara, saqqummersitassara nammineq siulleq kalaallisut suliariumaarlugu, Miki Fencker Thomsen takorluuivoq nangillunilu.
- Kisianni-una massakkuugallartoq unammiartornissaq eqqarsaatigissagaanni arlaatigut nunarsuamioqatigiinni pingaartuuvoq periarfissaqarniaraanni angusasrissaarnissamut periarfissap atornissaa. Miki qanoq takorluugaqarnersoq aperaarput.
- Massakkut eqqarsaatigineruara taakunga piguma qanoq iliussanerlunga . Erinarsugassara nalunngereerpara. Takorluukkakka qaffasitsippallaarnaveersaarlugit, soorunalimi uannut tatigalunga torrallaasinnaanissaralu upperalugu, Miki Fencker Thomsen taama naggasiivoq.