Pakistani aningaasaataarulluinnalerpoq
Pakistan aningaasaqarnikkut nakkaattuuleraluttuartoq ikiortissaaleqeqaaq. Naalakkersuisunngorlaat nunanut qanigisaminnut USA-mut, Saudi Arabiamut Kinamullu qinnuulooraluarlutik itigarput, nunammi taakku aamma aningaasarlioramik. Nunanit taaneqartunit apeqquserneqarpoq sooq Pakistanip aningaasaatimi tamarluinnangajaasa sorsunnernut, nunamilu peqquserlullutik aningaasannanniartunut atugassaanik tapiissanerlutik. Periarfissatuaalerpoq IMF-imut atorniarnissaq, Pakistanimilu naalakkersuisut qinnutigisimavaat 5 mia. dollarsinik atukkinneqarnissartik; akuerisaanngikkunimmi Pakistan isasoorluinnartussaavoq. USA-p inatsinera malillugu Pakistanimi naalakkersuisut qaqqarsuarni isertorlutik akiuuttunik akiuiniarput, kinguneraalu Pakistanimi naggueqatigiit assigiinngitsut eqqissiviilliulernerannik. Sakkutuunik immikkut sungiusakkanik qaqqarsuarnut pinerliinianik Talebaninik Al-Qaedakkunnillu akiuisussanik aallartitsigaluarnertik iluatsinnginnamikku, timmisartunik inuttaqanngitsunik nunamit aqutanik, qaartartunik nakkaatitsigaluarsimapputtaaq.
Ukiut kingulliit arfineq marluk akiuiniarnerigaluit iluatsinngitsoormata maanna Pakistanimi naalakkersuisut pikitsitsisut siuttui eqqisseqatigiinnissamik isumaqatiginninniarfigilersaalerpaat.