Ammeriviup pisortaa: -Ingerlaqqissinnaanngorpugut!

- Tunisassiorfiup pisarnertut ingerlaannarnissaanut periarfissaqalerpugut tassa imaappoq piniartut puisittaasa amiisa pisiarinissaanut taamatuttaaq avammut amernik tunisinissatsinnut periarfissaqaqqilerluta. Taamatullu aamma maani Great Greenlandimi ammerisarnerput nangissinnaanngorparput taamaalillugit tuneriaannanngorlugit. Amminik tunisassiortut kikkulluunniit nalunngilaat amminik tunisassiorneq ukiorpassuarni appartarlunilu qaffattartoq. Taamaattumik maanngaanniit soorunami neriuutigaarput amernik tunisassiornerput kingumut aamma siunissami qaffaqqikkumaartoq, Henrik Estrup radio aviisimut oqarpoq.

Ataatsimiititaliamiit piumasarineqarpoq Naalakkersuisut ammeriviup aningaasaqarnikkut ineriartornera pillugu ataatsimiititaliamut ingerlaavartumik ilisimatitsissuteqartassasut. Qaammatinilu tulliuttuni aqqaneq-marlunni minnerpaamik qaammatit allortarlugit ilisimatitsissummik naatsumik kalaallisut danskisullu allassimasumik ataatsimiititaliap nassinneqartarnissani kissaatigaa.

Kalaallit Nunaata ammerivia pillugu aqagu itinerusumik sammisaqaqqikkumaarpugut.