Anisitaaneq akisooq
Akiligassaq, 30.000 koruunit pallilluinnarlugit angissusilik, anisitaasumut ingerlateqqineqarpoq.
INI A/S-ip Qaqortumi immikkoortortaani atuisut sullinnerannut pisortap, Martin Riis Jensenip nassuerutigaa, inissiap sisamanik initallip suliarineqarnera, akisugineqarsinnaasoq:
- Nassuiaanerit aallaavigissagutsigu, akiligassiissut naleqqutinngilaq, upperineqarsinnaananilu. Suliaq 2006-imeersuuvoq, uangalu allatut ajornartumik Inip sulisui suliamik suliarinnittut akiligassiissutigineqartunik nakkutiginnissimanissaat upperaara. Taamaattumik ilaqutariit pisattaminnik poortuisimanerarnerat upperinngilara. Tassami pisattat poortorneqareersimappata poortoqqinneqarsinnaanngimmata. Aamma upperisariaqarpara ilaqutariit pisatarpassuaqarsimanissaat. Aamma inigisaat akunnerni 61-ini eqqiarneqartariaqarsimammat, inigisap qimanneqartup ipertulluinnarsimanera upperisariaqarpara, Martin Riis Jensen akivoq nangillunilu:
- Ilaqutariit pisataqarpallaarsimanngippata 29.563 koruuninik akiligassinneqarsimanerat annertuallaarujussuarpoq, Martin Riis Jensen oqarpoq.
- Akiligassiissutigineqartut eqqortuullutillu naleqquttuunissaat, naleqqutinngippatalu akuerisussaannginnatsigik uanga akueraara, tamannami akisussaaffigaarput, Martin Riis Jensen oqarpoq.
Inissiamit anisitaasut ilanngutassiami pineqartut, akiligassat kinguaattoorutigisimasaat, naliginnaasumik iluarsaassinerit paarsinerlunnerullu kingunerisaanik akiligassat, nuunnermilu aningaasartuutaat katikkaanni 100.000 koruuniupput.