Qallunaat taaseqataanissartik pisariaqarsorinngilaat

Namminersornerullutik Oqartussat allaffeqarfissuanni Nuummiittumi qallunaat sulisorineqartut ilaat namminersulernissamut taasiartorniarnersut paasiniaaffigaavut. Theis Greve Hansenilu ima akivoq:

- Naagga, taasiartornianngilanga, piffissarmi sivikitsuinnaq maaniittussaangama misigisimavunga taaseqataanissara pisariaqanngitsoq, Taannali kisimiinngilaq. Torben Weyhe aamma taasiartornianngilaq:

- Naagga, taasiartorniarnanga eqqarsarpunga, pissutigalugu piffissaq sivikitsuinnaq maaniikkama misigisimanngilanga uanga tassani tasissallunga, kalaallimmi namminneerlutik tamanna aalajangigassaraat, Torben Weyhe nassuiaavoq. Allanillumi aamma nalornisoqarpoq. Helle ukiuni qulini nunatsinni najugaqarsimasoq aamma nalornivoq:

- Nalornivunga taasiartussanerlunga, misigisimavungami nalornissutigalugulu ilumut taasiartornissara pisussaaffiginerlugu.

Lise Holm Rasmussen siunissami nunatsinniiginnarnissaminut eqqarsaateqanngikkaluarluni novembarip 25-ani taasiartoqataaniarluni aalajangersimavoq, tamanna ima nassuiarpaa:

- Aap, taasiartoqataaniarpunga, pissutigalugu oqartussaqataanerup aqqani qanoq isumaqarnermik misigisimanerup ersersinnissaa pingaaruteqartutut isigigakku. Kisianni apeqqutigisavit akinissaa nalunartuuvoq, tassami qallunaat allat maaniittut assigalugit piffissaq sivikitsuinnaq maaniittussaavunga, misigisimavungalu ilumut tamatumunnga akuliutissanerlunga, Lise Holm Rasmussen nassuiaavoq nangillunilu:

- Kisianni taaseqataassaanga, imaassinnaavorli angernangalu naaggaarnanga taasisunga, isumaqarama tamanna Kalaallit Nunaannut iluaqutaassasoq, taama Namminersornerullutik Oqartussat allaffeqarfissuani atorfillit ilaat Lise Holm Rasmussen oqarpoq.