Inuuneritta aningaasanik agguaassivoq
Feeriap nalaani aaqqissuussinerit, pinnguartarfiit nutaat aamma timimik aalatitsinerit, ilaatigut tamakkuupput Namminersornerullutik Oqartussat Inuuneritta pulje-mit tapiiffigisassaanni pingaartinneqarnerusut. Qinnuteqaatit katillugit 32-t 400.000 koruuninik aningaasartallit akuersissutigineqarput.
Skrevet af Mads Lynge
14. oktober 2008 05:22
Suliniutit aningaasaliiffigineqartut allat ilaatigut tassaapput Qaqortumi angajoqqaat ilinniartitaanerat, Maniitsumi Ilulissanilu kissaatiginagu naartulertarnerup pinaveersaartinneqarnissaa aamma Paamiuni aalakoornartumik aamma hashimik atornerluisunut oqarasuaatikkut saaffiginnittarfiup aallarnisarneqarnissaanut tapiissutit.
Najukkani suliniutinut pinaveersaartitsinermik peqqinnermillu siuarsaanermi, innuttaasut peqqinnerulernissaannik taamalu Kalaallit Nunaanni inuunerup naleqassusianik pitsanngortitsisussanik siunertallit taperserneqarnissaannut Inuuneritta Pulje agguaassisarpoq.
