Sisimiuni innarluutilinnut atugassarititaasut ajorluinnarput

Kaassuartakkanik ingerlateqaleqqammersup, Rita Christensenip, angutaa, Poul Christensen, Sisimiuni atugassarititaasut pillugit ima oqarpoq:

- Sisimiuni qamutinut kaassuartakkanut qummukartarfiit ima sivingatigipput allaat qummukarfiginissaat ajornarluinnartarluni. TELE-POST-ip illutarsuani sivingassuseq akuerisaasumit 300 procentimik qaangerneqarsimavoq inuunermullu navianarluinnarluni, kommuni peqqunikuuarput matoqqullugu.

- Brugseni maanna aamma allanngortiterivoq, qummukariarli aqqutigissagaanni minnerpaamik qaqqasiortartuusariaqarpoq, innarluutilinnummi naleqqutinngilluinnarmat, Poul Christensen nassuiaavoq.

Rita Christiansenip Sisimiuni pisiniarfik iserfigisinnaasatuaa tassaavoq Pisiffik. Aamma Sisimiut Kommunea tamanut iserfiusinnaagaluartoq, ininut qullernukarniaraanni INI A/S-ip qullersaqarfiatigoortariaqartarpoq, qummukariarli aamma akuerisaasumit pingasoriaat sinnerlugu sivinganerummat ajornarluinnarluni.

- Isumaqarpunga innarluutilinnut atugassarititaasut ajorluinnartut. Kinami alla ikinngutiminik, ilaquttaminik allamilluunniit ikiortileqqaarluni allaffissuarmukartarmat. Inatsiseqareerpoq, innarluutillit atugaannik pitsaanerulersitsisussamik, kisianni arlalinnit malinneqanngilaq. Taamaammat ilaqutaalluni annernaqaaq. Poul Christensen oqarpoq.

- Misiginartarpoq, panippununa ilinniaqqusaanngitsoq, suliffeqaqqusaanngitsoq, allatulli inuusuttooqqusaanngitsoq, soorlu ikiorneqartinnani nammineerluni pisiniarfiliarsinnaanngilaq. Inuttut pisinnaatitaaffinnik tamanna unioqqutitsineruvoq, ataataasoq oqarpoq.

Nuukkusunnersut aperigatsinni oqarpoq, Sisimiuniinnertik nuannarigamikku, killissaa tikillugu pissutsit ajunnginnerulernissaat sorsuutigissaqqaarlugu.

Qamutinik kaassuartakkanik ingerlatillit ajornaquteqanngitsumik isersinnaasarnissaat sanaartornermi eqqumaffigineqarnerunissaa Inatsisartut ippassaq oqaluuseraat.

Sanaartornermi qummukartarfiit mininneqartaannarput, kisianni peqarnissaq inatsisineereerpoq, taamaattumik Ilaqutariissutsimut Peqqinnissamullu Naalakkersuisoqarfik maanna kaassuartakkanik ingerlatilillit periarfissaat pillugit misissuisitsinialerpoq, 2 mio. koruuninillu aningaasaliisoqarsimavoq.