Siumut Ilulissat: Kommuninik iluarsartuusseqqinneq nalilersorneqarli!
Innuttaasut pitsaannginnerusumik sullinneqalernissaannik ernummateqarneq pissutigalugu, Ilulissani Siumup kommunalbestyrelsimut ilaasortaatitai piffissaq kingulleq atorlugu, kommuninik aaqqissuusseqqinnerup, januaarip aallaqqaataani eqqunneqartussap nalilersoqqinneqarnissaa piumasaraat.
Skrevet af Elisa Isaksen
Ilulissani kommunalbestyrelsimi Siumumut ilaasortat ernummateqarnerminni, Qaasuitsup kommunissaata, aningaasarsiornikkut Ilulissat kommuniannit kisimi nammanneqarnissaanik, naalakkersuisut siulittaasuata Hans Enoksenip oqaasii, innersuussutigaat.
- Hans Enoksenip oqaaseqarneratigut, Ilulissat kommuniata kisimiilluni aningaasartuutinik nammattuunissaa ernummatigaarput. Inunnik isumaginninnerup ataani innutaasunik sullissinerup, atuartitaanerup meeqqanillu sullissinerup appariarnissaat akuerisinnaanngilavut, nalunaarumminni allapput, Inatsisartullu kajumissaarlugit kommuninik aaqqissuusseqinnissaq isumaliutigeqqeqqullugu.