George W. Bush itigartitsinermut annilaaqaaq
- Ajornartorsioqigatta annertuumik pilersaarusioraluarpugut, aningaasatigut annaassiniarneq pillugu pilersaarut innuttaasut sinnerlugit sinniisoqarfimmi atorfilinnit tupaallaatigineqaqisumik itigartinneqareersorlu tusagassiortunik nalunaaquttap akunnialunngui qaangiuttullu katersortitsinermi George Bush oqarpoq. Taasisitsisoqarmat itigartitsisut 228-upput illersuisut 205-iusut.
Pilersaarut itigartinneqaqqammiinnartorlu aktiat New Yorkimi Wall Streetimi nalingat aatsaat taama appasitsigilerpoq. Præsidentip parteeqatai, Republikanerit, tassaapput aningaasaqarneq annaanniarlugu pilersaarummut akerliunerpaat.
Republikanerit amerlanersaat isumaqarput, aningaaseriviit taarsigassarsiniartarfiillu, akisussaassuseqannginnerminnik takutitsisereersut, annaanniarlugit, akileraartartut aningaasaataat atorlugit naalagaaffiup annaassiniarniarnera atorsinnaanngitsoq.
Innuttaasut sinnerlugit sinniisoqarfimmi, tassa Repræsentanternes Hus-imi, siusinnerpaamik sisamanngorpat aatsaat taasisitsisoqaqqissinnaassaaq.
Sinniisoqarfimmi siulittaasoq, Demokrateq Nancy Pelosi, oqarpoq, aningaasarsiornerup
annaanniarneqartuarnissaa Kongresip anguniartuassagaa.
