Atorfillit akornanni toqqissisimanngitsoqarpoq

Januaarip aallaqqaataani 2009-mi kommunit kattussuuppata, ikaarsaarnermi kommunini sulisunik soraarsitsisoqassanngitsoq, ullaaq radioaviisimi oqartoqaraluarpoq.

Ukiormanna juunip 30-annili atorfillit kommunini nutaani sumi atorfeqalernissartik pillugu allagarsereertussaagaluarput. Taanna Namminersornerullutik Oqartussaneersut pingasut KANUKOKA-meersullu marluk siorna sulisut pillugit pilersaarusiaat malillugu ulluliussat maannamut eqquutsinneqanngitsut ilagiinnarpaat.

Toqqissisimannginneq pillugu Atorfillit Kattuffianni siulittaasoq Erik Hammeken ima oqarpoq:

- Ullumikkut 18-inik borgmestereqarpugut, 18-inik kommunaldirektøreqarluta 18-inillu ingerlatsivinni pisortaqartiterluta. Ilaalli 17-iupput Ivittuut Kommuneat peqanngimmat. Tamakku tamarmik sisamaannanngorrattussaapput. Apeqqutit akineqartussat tassaapput, pisortaasimasut pisortaajunnaartussallu qanoq pineqassappat? Siunissami sulerissappat? Qangali naammassereersussaagaluit suli ilisimaneqanngillat, Erik Hammeken nassuiaavoq.

Kommunini sulisut pingaartumillu tjenestemandit siunissaminnut ernummateqarmata paasilluarsinnaanerarpaa. Oqarpoq atorfillit soraarsikkuminaatsuunertik inatsisitigullu sakkortuumik illersugaanertik pillugu ernummatissaqanngikkaluartut.

- Sumili inissinneqarnissartik suli ilisimannginnamikku toqqissisimanngillat, oqarpoq.

Atorfillit kattuffiat sinnerlugu piumasaqarpoq.

- Naalakkersuisut annertunerusumik piumaffigisariaqanngillat, kisianni Ikaarsaariarnermut Ataatsimiititaliat piumaffigisariaqarpagut suliassatik kommunerujussuit inuttalersornissaannut tunngassuteqartut piaarnerpaamik suliariniaqqullugit, sulisut taamaalillutik aamma toqqissiniassammata.

Naalakkersuisut siulittaasuata Ikaarsaariarnermilu Ataatsimiititaliat siulittaasuisa sisamat tusagassiuutinut nalunaaruteqarnerminni erseqqissaatigaat kommunini sulisut kommunit kattunnerannut atatillugu suliinnarnissaat qulaarnarneqartussaasoq, tamannalu Ikaarsaariarnermi Ataatsimiititalianit aamma uppernarsarneqareersoq.