Inatsisartuni ataatsimiititaliat inissititerput

Augusta Salling Aningaasaqarnermut ataatsimiititaliami siulittaasunngorpoq, Per Berthelsenilu, Siumumut ilaasortanngoqqammersoq, siulittaasup tulliatut inissilluni.

Inuussutissaqarnermut ataatsimiititaliami siulittaasunngortoq tassaavoq Jonathan Motzfeldt. Godmand Rasmussen, Atassaut, Attaveqarnermut ataatsimiititaliami siulittaasunngorpoq, Atassullu sinnerlugu inatsisartunut ilaasortaq Emilie Olsen avatangiisinut ataatsimiititaliami siulittaasunngorluni.

Jonathan Motzfeldt ataatsimiititaliami allami siulittaasusut aamma inissippoq, tassa aalisarnermut piniarnermut nunalerinermullu ataatsimiititaliami siulittaasunngorami.

Ilaqaturiinnermut ataatsimiititaliami siulittaasunngorpoq Isak Davidsen, Siumut.

Peqqinnissamut ataatsimiititaliami Siumumeersoq Vittus Mikaelsen siulittaasutut inissippoq.

Kristian Jeremiassen, Atassummeersoq, marlunnik aamma siulittaasuuffeqalerpoq, tassa akileraartarnermut ataatsimiititaliami aamma kultureqarnermut, ilinniartitaanermut, ilisimatusarnermut ilageeqarnermullu ataatsimiititaliami siulittaasunngorami.

Inatsisartuni ataatsimiititaliat 17-iupput.

Namminersorneq pillugu ataatsimiititaliami Augusta Salling siulittaasuulerpoq, Lars-Emil Johansenilu siulittaasup tulliatut qinigaalluni.