PPK Namminersornerullutillu Oqartussat akornanni assortuuttoqarpoq
Sermitsiap nittartagaani tamanna atuarneqarsinnaavoq.
Sulisitsisut iluarisaannaq tunngavigalugu piffissami sivikitsuinnarmi atorfinitsitsisarnissaq kissaatiginngikkaat pillugu Namminersornerusut isumaqatigiinninniartitaasa pisortaata Palle Ømarkip marlunngornermi oqaatigisai PPK-p siulittaasuata Karin Hollerip illuatungilerpai, sulisitsisut taannarpiaq siunertarigaat oqaatigalugu:
- PPK-p piumasaqaatigaa ukiuni marlunni atorfinitsitsisarnissaq, tassa amerligaluttuinnartut piffissami sivikitsuinnarmi atorfeqarnissaat kissaatigimmassuk. Tamanna sakkortunerpaamik itigartinneqarpoq, tamanut piginnaatitaaffittut atuutilissammat, taamaalillunilu aamma sulisitsisut iluarisaannaannut atorsinnaajunnaarluni, Karin Holler oqarpoq.
- Sundhedsassistentit allallu piffissami sivikinnerusumik atorfininnissartik naatsorsuutigissanngilluinnarpaat, tamannalu naalakkersuisut isumaqatiginninniartuinit toqqaannartumik oqaatigineqarpoq, Karin oqarpoq.
2009-mi apriilip aallaqqaataaniit qaammammut akissarsiatigut 4.000 koruuninik qaffaavigineqarnissaamik neqeroorfineqarsimanera pillugu Palle Ømarkip oqaasii Karin Hollerip akerlilerpai.
- Tamanna aamma ilumuunngilaq. Taakku 4.000 koruunit neqeroorutigineqartut PPK-p iluani gruppenut aalajangersimasunut neqeroorutigineqartut ukiut pingasut ingerlaneranni tunniunneqartussaapput, taannartaalu allaalluinnarpoq, Karin Holler Sermitsiamut oqarpoq.