Qamissimaartitsinermi innaallagissamut sipaalaarpugut
Nuummi Nukissiorfimmiit nalunaarutigineqarpoq, qulliit qamiterneqarmata kallerup inneranik atuineq 18.860 kilo watt-imiit 17.760 kilo watt-imut appartoq, tassa 900 kilo watt-imik apparluni, sipaarutillu affaa aqqusinerni qulliit qaminnerannit pisoq.
Nukissiorfiit pilersuinermut pisortaat, Carsten Hassing Rasmussen, oqarpoq, kallerup innera atorlugu kiassarneq atorneqaqimmat, qulliit qamiteraluarmataluunniit nukissiorfimmiit pilersuineq appariaateqarpallaanngitsoq.
Kommuneqarfik Sermersuumi qulliit qamiternissaannik aaqqissuisoq, Katrine Hjelholdt Nathanielsen, oqarpoq, inuit peqataaniartut Danmarkimisuulli nalunaarsorneqarsinnaanngimmata qassit peqataasimanersut paasiuminaatsoq. Katrine Hjelholdt Nathanielsenili oqarpoq, annertunerusumik aaqqissuulluagaaanerusumillu aappaagu aaqqissuisinnaassallutik neriuutigalugu.
