Kunnginngortussat naligiisitaasalernissaat taasissutigineqassaaq
Namminersornerullutik Oqartussani nunap iluani pissutsinut aqutsinermullu immikkoortortaqarfimmi pisortaq Hans-Erik Bresson radioaviisimut oqarpoq. Taassuma inunnik taasisitsinissap qanoq akeqarnissaa ippassaq taajumanngikkaluarpaa, maannakkulli naatsorsuutigalugu tamanna Nunatta Karsianut 100.000 kr.-it missaannik artukkiiumaartoq.
-Tamannalu missingersuutit iluanni pisinnaassaaq. Ukioq manna qinersinissanut 600.000 kr.-it immikkoortinneqarput, taakkualu amerlanersaat Inatsisartunut qinersisoqarnissaani atorneqassallutik. Inunnilli taasisitsinissaq taamaallaat aappimik naaggamilluunniit akineqartussaq akikinneralaarsuuvoq, taama Hans-Erik Bresson oqarpoq.
Nunatta Karsiata saniatigut aammattaaq kommunit taasisitsinermut aningaasartuuteqassapput.
Allannguutissatut siunnersuut ima kinguneqassaaq Ataqqinartorsuup meerartaava siulleq kunnginngussalluni, nukappiaraanersoq niviarsiaraanersorluunniit apeqqutaatinnagu. Allannguutissami ikinnerpaamik taasisinnaasut tamarmiusut 40 procentit angernissaat piumasarineqarpoq.