Ini silaannarissoq pillugu ataatsimeersuarneq avammut nioqquteqarnissamik neriullualersitsivoq

Issittumi inissianik sanaartornermut Kalaallit Nunaata qanoq ilisimasaqartiginini nunarsuarmiunut sapaatip akunnerata ingerlanerani takutippaa. Taama oqarpoq ini silaannarissoq pillugu ataatsimeersuarnermi “Cold Climate”-mi pisortaasoq, ingeniør, Bent Michael Nielsen. Sisimiuni ataatsimeersuarneq ullumikkut naammassineqarpoq, minnerunngitsumik Kinamit peqataasut kalaallit misilittagaat atorluarsinnaavaat.
19. marts 2009 16:14

- Kinamiut uagut illuliortarnitsinnut assingusumik illuliortalerniarput. Tassa ilaatigut nukimmik atuiffiusorujussuarmik. Ilisimariikkatsinnik isumassarsisinngikkutsigik, nukissiuutinik assigiinngitsunik nunarsuatsinnut iluaqutaanngitsunik atuilissapput. Taamaattumik nungusaataanngitsumik atuinermut nunarsuarmiunit atugaaleriartortumut tamatta akisussaaqataavugut, Bent Michael Nielsen oqarpoq.

Taanna aperineqarami ilisimasavut avammut tuniniarsinnaanerivut akivoq, tamanna avaqqunneqarsinnaanngitsoq.

- Nunarsuarmi allamiit maanga tikilluni soqutiginartorpassuarnik takusassaqarpoq. Soorlu Sanaartornermik Ilinniarfik qiviaannarutsigu, ilinniarnerit ilisimatusarnerlu siuarsimasorujussuupput. Kalaallit Nunaanni Danmarkimilu ilisimasat, nunarsuatsinni nunanut issittunut allanut tuniniarneqarsinnaanerat qularutissaanngilaq, Bent Michael Nielsen oqarpoq.

Ilisimatusartut sanaartornermillu ingerlatallit 100-t nunarsuatsinni tamarmeersut ataatsimeersuarnermi peqataapput.

Læs også

Døgnrapport: Indbrud og flere forsøg på indbrud natten igennem