Avataarsuanut takornariassamaat
Sulinngiffeqarlutimmi angalaniartunut neqeroorutit nutaat ilaagaat avataarsualiarnissaq. Århusimi angalatitsivik Hannibal & Marco Polo, avataarsualiarusuttunut neqerooruteqarpoq. Hannibal & Marco Polo-p pisortaa, René Andersen oqarpoq, Sikuijuitsumut kujallermukartitsisarpugut, sikunik aserorterummik atomitortumik attartorluta Qalasersuarmut angalatitsisarpugut, nunarsuatsinni qaqqat portunersaatigut, Mount Everestikkut qaqqasiorusuttut angalatittarpagut, soorunami taava avataarsualiartitsisarneq tullinnguuttariaqarpoq.
Avataarsuanut alakkaanneq 1,1 miliuuni koruuninik akeqarpoq, ullorpassuillu atortariaqaratik. Tassami avataarsualiartut nunarsuatsinniit 110 kilometeritut avasitsigileraangamik, minutsini arfineq pingasuni oqimaassuseqaratik misigissavaat, nunarsuatsinnullu uteqqillutik.
