Biilinut mingutsitsinngitsunut akitsuutit peeqquaat
- Avatangiisinik mingutsitsinngitsunik biileqarnissarput Kalaallit Nunaanni pingaaruteqarpoq. Taamaattumik akikitsuusariaqarput, Demokraatit siulittaasuat, Jens B. Frederiksen oqarpoq, biilinut CO2-mik aniatitsinngitsunut tunngatillugu aalajangiinissamik inatsisartut upernaakkut ataatsimiinneranni siunnersuuteqassamaartoq.
Jens B. Frederiksenip eqqoriarusunngilaa biilit innaallagiatortut siulliit Nunatsinni qaqugu takusinnaassanerigut - imaluunniit pigilerniaraanni qanoq akeqassanersut.
- Oqaatigissallugu siusippallaarpoq. Takusinnaavarpulli biilit innaallagiatortut nunarsuaq tamakkerlugu atugaanerat annertusiartortoq. Erngup nukinganik akikitsumik peqartilluta Kalaallit Nunaanni tunisaalluarsinnaanerat upperaara, Jens B. Frederiksen oqarpoq.
Demokraatit siunnersuutaat Nukissiorfinnit tigulluarneqarpoq.
- Tusagaq nuanneqaaq. Biilit akitsuutaasa peerneqarnissaat silatusaarnerussaaq, Nukissiorfinni ineriartornermut siunnersorti, Jens-Peter Bak Henriksen, AG-mut oqarpoq.