Tunngaviusumik ilinniarfiit unitsitsiffiunerpaajupput
Tunngaviusumik ilinniarfiit tassa allaffissorneq, sanaartornermik ilinniarfiit tassaapput ilinniakkamik unitsitsiffiunerpaasartut. Tassani 61 procentit ilinniakkaminnik unitsitsisarmata. Ilinniartut ilinniakkaminnik unitsitsiinnartut 2004-mi 643-pput, 2008-mi 478-iullutik. Kisitsisit takutippaattaaq ilinniakkaminnik naammassisartut 2004-miit 2008-mut amerleriarsimasut.
Piginnaanngortitsisartunik ilinniagaqarniarlutik 2008-mi aallartittut 1183-upput. Ilinniarfiit pingasunngorlugit agguataarneqarput: tunngaviusumik ilinniarnerit,
ingerlaqqiffiusumik ilinniartitaanerit akunnattut, tassaallutik perorsaasunngorniat inulerisut assigisaallu. Kiisalu ingerlaqqiffiusumik ilinniartitaanerit tarnip pissusaanik ilisimasalinnut, kigutigissaasut assigisaanillu ilinniarfiullutik. Ukioq kingulleq 479-it ilinniakkaminnik naammassinnipput 478-illu unitsitsiinnarsimallutik.
Saviminilerinermik Ilinniarfik assersuutigalugu 2008-mi 75-it ilinniagartik unitsiinnarpaat, 62-illu ilinniakkaminnik naammassinnillutik.
Savimminilerinermik Ilinniarfimmi ilinniartunut siunnersortip, Klaus Lennertip, ilinniartut ilinniakkaminnik unitsitsisarnerat ilinniartut ullaakkut takkutinngitsoorneranik tunngavilersorpaa.
Ilinniartitaanermut tiimit aalajangersakkanit 10 procentiisa takkutinngitsoornermik anguneqaraangat ilinniartut ilinniarfimmit anisinneqartarput.
- Ilinniartut 8 procentimik takkutinngitsoorsimaleraangata ilinniartut oqaloqatigisarpavut paasiniaavigalugit sooq taama annertutigisumik takkutinngitsoortigisimanersut, siunnersorniartarlugillu.
- Ilinniartut ilinnialernerminni isumaqatigiissummik atsiortarput. Isumaqatigiissutigiissummilu piumasaqaatit ilinniartunit piviusunngortikkuminaatsinneqartarput, Klaus Lennert naggasiivoq.