Peqqinnissaqarfimmi missingersuutit aqunneqarnerat misissortippaa
Peqqinnissaqarfimmi missingersuutit piviusorsiunnginnerarlugit aningaasaqarnermut naalakkersuisup, Per Berthelsenip isornartorsiuinera ilassilluarpaa, suliamullu attuumassuteqanngitsunit misissuisoqarnissaq Peqqissutsimut naalakkersuisup isumaqatigalugu.
Ukiuni kingullerni missingersuusianit sippuisoqartariaqarsimanerit takutippaat missingersuusiortarnerit pitsaanerusumik aqunneqarnissat, tamannalu pillugu peqqinnissaqarfiup aningaasaqarneranik misissueqqissaartussanik Naja Petersen suliaqartitsivoq. Misissuitsinerup kingorna paasineqassaaq aningaasaqarnermut aqutsineq aqutseriaatsimillu pitsaanerusumik paasissutissiisarnissaq anguneqassammat, Naja Petersen oqarpoq.
Arlaannaannulluunniit attuumassuteqanngitsunit peqqinnissaqarfiup aningaasatigut inissisimaneranik misissuisitsinissaq Naja Petersenip isumaqatigaa, namminerlu misissuitsinini aamma aallartillugu.
Peqqinnisaqarfimmi aningaasatigut aqutsineq aqutseriaaserlu pitsaanerusoq anguneqassaaq, aammalu aningaasatigut inissisimanera pillugu naalakkersuisut, inatsisartut allallu attuumassuteqartut paasissutissanik pissarsisinnaanissaat ajornannginnerulissammat.
Peqqinnissaqarfimmi immikkoortortaqarfiit inissisimanerat paasiniarlugu Peqqissutsimut naalakkersuisup Naja Petersenip pingasunngorpat oqaloqatigissavai.